главная

Мұғалімдердің біліктілік арттыру курстары кейінге шегерілді

March 17, 2020

Білім және ғылым министрі Асхат Аймағамбетов коронавирустың таралуына жол бермеу үшін еліміздегі мұғалімдердің курстары кейінге шегерілгенін, кейбірі онлайн форматқа ауыстырылғанын мәлім етті, деп хабарлайды ҚазАқпарат тілшісі.

 

«Қосымша білім беру ұйымдарына келер болсақ, балалар сарайы, музыка мектебі біздің елде көп. Бұл ұйымдарға бір ғана мектептің ғана емес, қаланың немесе елді мекеннің барлық балалары келеді. Сондықтан осындай білім беру ұйымдарында инфекцияны жұқтыру қаупі өте жоғары. Сондықтан осыны ескере отырып, білім беру ұйымдарының жұмысын 5 сәуірге дейін тоқтаттық», - деді Асхат Аймағамбетов ОКҚ-да өткен баспасөз мәслихатында.

 

Министрдің айтуынша олимпиада, спартакиадалар да кейінге шегерілген.

 

«Балдәурен, Бөбек секілді лагерьлерге де балаларды алуды тоқтаттық. Біліктілік арттыру курстары өтетінін білесіздер. Оған он мыңдаған мұғалім қатысуы керек еді. Бірақ оның көбін онлайн форматқа көшірдік. Ал онлайн форматқа көшпейтін курстарды біз мерзім бойынша шегеру туралы шешім қабылдадық», - деді ол.

 

Еске сала кетсек, Денсаулық сақтау министрі 14 наурызда елордада өткен баспасөз мәслихатында Елжан Біртанов Қазақстанда екі адамның коронавирус жұқтырғанын жеткізген еді. Көп өтпей Милан қаласынан Нұр-Сұлтанға келген тағы бір қазақстандықтан коронавирус инфекциясы табылды.

 

Кейін Германиядан ұшып келген Қазақстанның тағы бір азаматынан коронавирус анықталды. Осылайша бұл дертке шалдыққандар саны 4 адамға жеткен еді.

Please reload

© 1999-2019  Редакция республиканского журнала "Современное образование"

МЫ В СОЦИАЛЬНЫХ СЕТЯХ

  • Vkontakte Social Icon
  • Instagram Social Icon